حامد جوهر شكرًا جوجل

أمس إحتفل محرك البحث جوجل بذكري وفاه الدكتور حامد جوهر في لفته طيبه من جوجل لقيمه هذا العالم الجليل الذي قدم أحد أهم وأشهر البرامج العلمية ٠
 النهاردة هحكى لكم عن عالم مصرى كبير اطلقوا عليه لقب ملك البحر الأحمر .. أول مصرى عمل برنامج ناجح جدا عن البحار .. بسط لنا المعلومات والحكايات عن الاسماك والبحار والمحيطات ..واللى مننا كبير شوية أكيد سمع برنامجه الأشهر فى التليفزيون المصرى .
النهاردة هحكى لكم حكاية الدكتور حامد جوهر
اسمع منى التفاصيل ... أكيد الشباب استغرب واتعجب من "افيه" سعيد صالح فى مسرحية العيال كبرت لما قلد صوت شخص تانى وهو بيكلم حسن مصطفى فى التليفون  ..وقال  "مساء الخير " بطريقة مميزة .. طريقة ضحك عليها سعيد صالح نفسه وضحكت كريمة مختار ... لأن دى اللازمة المميزة والصوت المميز للدكتور حامد جوهر واللى وقتها كان بيقدم البرنامج  الاشهر فى التليفزيون المصرى "عالم البحار " والى فضل يقدمه مساء كل يوم جمعة لمدة 18 سنة متصلة وكان من أهم البرامج اللى بتتجمع الأسرة المصرية لمتابعتها ..لأنه كان بيشرح ببساطة كل مايخص عالم البحار وبيقدم مادة  فيليمة علمية بطريقة مبسطة وجميلة .
فمين هو الدكتور حامد جوهر .. وليه سموه ملك البحر الأحمر
اسمع منى الحكاية ..
العالم الجليل، الدكتور حامد جوهر صاحب  أشهر الافتتاحيات فى تاريخ التليفزيون المصرى «مساء الخير» بصوته الرخيم وحضوره الوقور، كان حلم حياته يدرس الطب ..وفعلا دخل كلية الطب .. وبعد سنتين دراسة وتفوق فجأة قرر يغير ويسيب كلية الطب ويروح يدرس فى كلية العلوم ويتخصص فى  أقسام علوم الحيوان وعلوم النباتات وعلوم الكيمياء وينجح فى التلاته بتفوق شديد ويشتغل معيد فى الكلية ويحصل على درجة الماجستير فى علوم الحيوان بإمتياز مع مرتبة الشرف .
طب النقلة من تدريس عالم الحيوان فى كلية العلوم .. لدراسة عالم البحار والتخصص فيه والنبوغ والتفوق اللى مالوش مثيل
وما اتكررش تانى ده حصل ايمتا وازاى وليه .
اسمع منى باقى الحكاية 
بعد التفوق الكبير فى كلية العلوم والنجاح بإمتياز مع مرتبة الشرف .. أحد أساتذة دكتور جوهر كافأة برحلة  إلى «محطة الأحياء المائية» بمدينة «الغردقة» فى البحر الأحمر... ودى الرحلة الى كنت السبب فى أن بقا عندنا عالم بحار كبير والدوريات العلمية العالمية بتنقل عنه وبتابعه وبتدعيه كل المؤسسات العلمية العالمية علشان يشارك فى أبحاثها عن عالم البحار .
فى الرحلة دى وقع الدكتور حامد جوهر فى حب محطة الأحياء البحرية والبحر الأحمر والغردقة وقرر يغير حياته بالكامل ويوهبها للمكان .. اتنقل هناك واشتغل ودرس وسجل كأول مصرى يتولى رئاسة محطة الأحياء البحرية عام 1934 وفضل رئيس لها لمدة 40 سنة كسر فيهم سيطرة الانجليز على المحطة سنين طويلة... مش بس كده دكتور حامد جوهر أسس كمان متحف الأحياء المائية بمنطقة البحر الأحمر. .وبدأ خطة فى دعم ونشر الوعى بعلوم الأحياء المائية.
الدكتور حامد جوهر له مغامرات فى عالم البحار وانجازات كبيرة منها اكتشافه لعروس البحر وهو اللى سماها هذا الاسم والعالم كله اعتمد الاسم ده بعد كده ..وقتها جولاته التفقدية المستمرة فى البحر كشفت له عن بقايا حيوان بحرى لم يتعرف عليه أول الأمر... ودأ يعمل عليه دراسات استمر 10 سنين وبعدها اكتشف انه حيوان بحرى على شكل انثى ..ووقتها نشرت الدوريات العلمية العالمية أبحاث الدكتور جوهر عن "عروس البحر" .
الدكتور حامد جوهر كرمه امبراطور اليابان عام 1962 وكان من أشد المعجبين بعلمه .. وحصل على جائزة الدولة التقديرية مرتين وعلى وسام الاستحقاق ...وكان من أشد الناس تواضعا .
قبل ما أنهى  كلامى عن الدكتور حامد جوهر ..عايز اقول لكم أن أحد تلاميذه شاف مسرحية العيال كبرت وغضب جدا من تقليد سعيد صالح لأستاذه العالم الجليل وبلغه وطلب منه يرفع قضية ويوقف المسرحية لكن الدكتور حامد جوهر قرر يشوف المسرحية بنفسه وضحك على تقليد سعيد صالح وأعلن انه معجب جدا بالمسرحية ورفض يرفع قضية .
الله يرحمه الدكتور حامد جوهر الرجل الذى وهب كل حياته للعلم .